Yol polisindən əlverişsiz hava şəraiti ilə bağlı çağırış

Daxili İşlər Nazirliyinin Baş Dövlət Yol Polisi İdarəsi (BDYPİ) ölkə ərazisində gözlənilən əlverişsiz hava şəraiti ilə bağlı hərəkət iştirakçılarına xəbərdarlıq edib.

hadiseler.info xəbər verir ki, Milli Hidrometeorologiya Xidmətinin məlumatına əsasən, avqustun 27-dən 30-dək Bakıda, Abşeron yarımadasında və bölgələrdə küləkli, yağıntılı hava şəraitinin hökm sürəcəyi, dağlıq ərazilərdə leysan, şimşək, dolu və sel ehtimalı olduğu bildirilib.

BDYPİ yollarda yarana biləcək təhlükələrin qarşısını almaq üçün təhlükəsizlik qaydalarını xatırladıb:

 Sürücülərə: Yağıntılı havada sürət həddini hava şəraitinə uyğun seçmək, ara məsafəsini artırmaq, sərt manevrlərdən və ötmədən çəkinmək tövsiyə edilir. Görünüş məhdudlaşdıqda işıq cihazlarından düzgün istifadə olunmalı, su basmış və sel riskli yollardan keçərkən təhlükəli hərəkətlərə yol verilməməlidir.

 Yük avtomobili sürücülərinə: Küləkli havalarda qoşqulu, tentli və uzunölçülü nəqliyyat vasitələrinin sürücüləri daşınan yükün etibarlı bərkidilməsinə və avtomobilin dayanıqlılığına xüsusi diqqət yetirməlidirlər.

 Piyadalara: Görmə imkanlarının məhdudlaşacağını nəzərə alaraq, yolu yalnız müəyyən olunmuş keçidlərdən və təhlükəsizliyə tam əmin olduqdan sonra keçmək tapşırılır.