“44” filminin nümayişi zamanı çəkiliş aparan şəxslər cəzalandırılacaq

Mədəniyyət Nazirliyi yanında Kino Agentliyi kinoteatrlarda nümayiş olunan “44” bədii filmi ilə bağlı ictimaiyyətə rəsmi müraciət edib.

hadiseler.info xəbər verir ki, qurum seanslar zamanı mobil telefon və ya digər cihazlarla filmin çəkilməsi, görüntülərin icazəsiz qeydə alınması və sosial şəbəkələrdə yayılmasının yolverilməz olduğunu bildirib:

“Bu cür hərəkətlər filmin istehsalçısına, yaradıcı heyətə və filmi izləməyə gələn digər tamaşaçılara qarşı hörmətsizlikdir. Qanuna əsasən, əsərin surətinin çıxarılması müəlliflik hüququ sahibinin müstəsna hüquqlarına daxildir. Qanunda surətçıxarma anlayışına videoyazı formasında hazırlanma da daxildir. Ona görə də filmin icazəsiz qeydə alınması və xüsusilə həmin görüntülərin paylaşılması müəlliflik hüquqlarının və qanunvericiliyin tələblərinin pozulmasına səbəb ola bilər”.
Kino Agentliyi tamaşaçılardan seanslar zamanı filmin mobil telefon və ya digər cihazlarla qeydə alınmamasını, habelə filmə aid görüntülərin hüquq sahibinin icazəsi olmadan paylaşılmamasını qəti şəkildə tələb edir.

Müraciətdə vurğulanıb ki, bu tələbləri pozan və qanunsuz çəkiliş aparan şəxslər barəsində qanunvericiliklə nəzərdə tutulmuş müvafiq məsuliyyət tədbirləri görüləcək.