6 noyabr – Azərbaycan Televiziyası və Radiosu Günüdür

Azərbaycanda hər il noyabrın 6-sı televiziya və radio işçilərinin peşə bayramı – Azərbaycan Televiziyası və Radiosu Günü kimi qeyd olunur.

hadiseler.info xəbər verir ki, respublikamızda ilk dəfə radio verilişlərinin yayımına 1926-cı il noyabrın 6-da başlanılıb. Həmin gün paytaxtın küçə və meydanlarında quraşdırılmış reproduktorlardan ilk dəfə “Danışır Bakı” ifadəsi səslənib ki, bu da xalqımızın mədəni və siyasi həyatında böyük yenilik idi. Azərbaycan Televiziyası yarandıqdan sonra isə bu tarix teleradionun yaranma günü kimi qeyd olunmağa başlayıb.

Teleradionun inkişaf mərhələləri və əlamətdar tarixlər:

 1956-cı il fevralın 14: Bakı Televiziya Studiyası ilk dəfə efirə çıxıb; ekranda mərhum sənətkar Nəcibə Məlikova görünərək çıxışına “Göstərir Bakı” sözləri ilə başlayıb və həmin gün “Bəxtiyar” bədii filmi nümayiş olunub. Elə həmin il Bakı şəhərində polad bloklardan yığılmış 180 metrlik ilk Televiziya qülləsi qurulub.

 1957-ci il iyunun 28: Səyyar televiziya vasitəsilə Respublika stadionundan ilk dəfə canlı yayım həyata keçirilib.

 1967-ci il: Ağ-qara televiziya yayımından rəngli (SECAM) TV yayıma keçid baş tutub.

 2016-cı il dekabrın 20: Ölkə ərazisində analoq TV yayımı tam dayandırılaraq rəqəmli TV yayımına keçid tam başa çatdırılıb.

 Azad olunmuş ərazilərdə yayımın bərpası: 2020-ci il dekabrın 31-dən etibarən Şuşa, Xankəndi şəhərlərində, Xocalı, Ağdam, Bərdə rayonlarında və ətraf yaşayış məntəqələrində televiziya və radio yayımı bərpa edilib, Şuşa Radio-Televiziya Yayım Stansiyasında müasir avadanlıqlar quraşdırılıb.

Hazırda respublikamızda ümumrespublika, regional, kabel, internet və peyk televiziyaları, eləcə də zəngin teleradio şəbəkəsi uğurla fəaliyyət göstərir, milli-mənəvi və mədəni dəyərlərimizin təbliğində mühüm rol oynayır.