9 illik təhsil bazasında kolleclərə qəbulun nəticələri açıqlandı

Dövlət İmtahan Mərkəzi (DİM) ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul üzrə keçirilmiş müsabiqənin nəticələrini rəsmən elan edib.

hadiseler.info xəbər verir ki, abituriyentlər qəbul nəticələrini DİM-in rəsmi internet portalından, həmçinin mobil operatorlar (Azercell, Bakcell, Nar) vasitəsilə “iş nömrəsi”ni 7727 qısa nömrəsinə göndərməklə öyrənə bilərlər.

Müsabiqədən uğurla keçərək tələbə adı qazanan şəxslərin diqqətinə çatdırılır ki, orta ixtisas təhsili müəssisələrinə qeydiyyat prosesi yalnız my.gov.az portalı üzərindən elektron qaydada aparılacaq. Bunun üçün Elm və Təhsil Nazirliyinin müvafiq xidməti “mygov” platformasında istifadəyə verilib.

Qeydiyyat prosesi 19 avqust saat 15:00-dan start götürəcək və 31 avqust saat 18:00-dək davam edəcək. Qəbul olunan abituriyentlər “mygov ID” vasitəsilə şəxsi kabinetlərinə daxil olaraq “Xidmətlər” bölməsindən Elm və Təhsil Nazirliyini seçməli və “Ali və orta ixtisas təhsil müəssisələrinə təhsilalanların qeydiyyatı” bölməsində müraciətlərini təsdiqləməlidirlər.

Xüsusi olaraq qeyd edilib ki, müəyyən olunmuş vaxt çərçivəsində qeydiyyatdan keçməyən abituriyentlər qəbul olunduğu ixtisasdan imtina etmiş sayılacaq və onların qəbul əmri təhsil müəssisəsinə göndərilməyəcək.