FHN Mingəçevirdə təhlükəsizlik tədbiri keçirdi- VİDEO

Fövqəladə Hallar Nazirliyinin (FHN) Dövlət Yanğın Nəzarəti və Kiçikhəcmli Gəmilərə Nəzarət və Sularda Xilasetmə Dövlət xidmətlərinin birgə təşkilatçılığı ilə Mingəçevir şəhərində “Kiçikhəcmli su nəqliyyatı vasitələrində yanğın təhlükəsizliyi” mövzusunda maarifləndirici tədbir keçirilib.

hadiseler.info xəbər verir ki, Mingəçevir Gənclər Evində baş tutan tədbirdə FHN-in, yerli İcra Hakimiyyətinin, Bələdiyyənin, DİN-in yerli struktur bölməsinin, Ekologiya və Təbii Sərvətlər Nazirliyinin 8 saylı Regional İdarəsinin nümayəndələri, eləcə də kiçikhəcmli gəmi istifadəçiləri və Kür çayının sahilindəki yanalma körpüləri ilə dayanacaq bazalarının məsul şəxsləri iştirak ediblər.

Müzakirələr zamanı kiçikhəcmli gəmilərdə, yanalma körpülərində və dayanacaq bazalarında yanğın təhlükəsizliyi qaydalarına riayət edilməsinin vacibliyi vurğulanıb. Diqqətə çatdırılıb ki, bu tipli su nəqliyyatında baş verə biləcək yanğınlar insan həyatı üçün böyük təhlükə yaradır. Tədbirdə cavabdeh şəxslər tərəfindən profilaktik tədbirlərin gücləndirilməsinin xüsusi əhəmiyyət daşıdığı bir daha xatırladılıb.