Prezident İlham Əliyev Qaradağda yeni zavodun açılışında iştirak edib- FOTO

Prezident İlham Əliyev Bakının Qaradağ rayonunda “Fabriora Group” MMC-nin kağız və gigiyenik məhsullar istehsalı müəssisəsinin açılışını edib.

hadiseler.info xəbər verir ki, İqtisadiyyat naziri Mikayıl Cabbarov və müəssisənin təsisçisi İbrahim Uygur dövlət başçısına yeni zavodun fəaliyyəti barədə ətraflı məlumat veriblər.

11 hektara yaxın ərazidə yerləşən və Almaniya, İtaliya, Türkiyənin müasir avtomatlaşdırılmış texnologiyaları ilə təchiz olunan müəssisədə kağız, uşaq bezləri, müxtəlif salfetlər və yuyucu vasitələr istehsal ediləcək. Ümumi investisiya dəyəri 27 milyon manat olan müəssisədə 240 nəfərin daimi işlə təmin olunması nəzərdə tutulur.

İnvestisiya müsabiqəsi vasitəsilə özəlləşdirilən zavod investisiya təşviqi sənədi əsasında avadanlıq idxalı zamanı ƏDV və gömrük rüsumlarından 1 milyon manat güzəşt əldə edib. İstehsal olunan məhsulların daxili bazarla yanaşı Gürcüstan, Qazaxıstan, Rusiya və Yaxın Şərq ölkələrinə ixracı planlaşdırılır.