“Bank Respublika” “Access Bank”ı alır

“Bank Respublika” ASC “Access Bank” QSC-nin səhmlərini satın almaq üçün strateji əqdin əsas şərtlərini təsdiqləyib.  

hadiseler.info xəbər verir ki, hər iki bankın səhmdarları arasında razılıq əldə olunub və əqdin bu ilin noyabr ayına qədər yekunlaşdırılması nəzərdə tutulur.  

Razılaşmaya əsasən, “Access Bank”ın mövcud səhmdarları “Bank Respublika”nın nizamnamə kapitalının 25%-ni təşkil edən yeni imtiyazlı səhmləri əldə edərək onun səhmdarlarına çevriləcəklər. Satınalma başa çatdıqdan sonra banklar ilkin mərhələdə ayrı-ayrı fəaliyyət göstərəcək, daha sonra isə Mərkəzi Bankın tələblərinə uyğun olaraq vahid bankda birləşdiriləcəklər.  

Birləşmə nəticəsində yaranacaq nəhəng maliyyə institutunun cəmi aktivlərinin 4,5 milyard manata, kredit portfelinin isə 3,3 milyard manata çatması gözlənilir. “Bank Respublika” Müşahidə Şurasının sədri Şakir Rəhimov və “Access Bank” Müşahidə Şurasının sədri Oleq İvaniyçuk bu addımın ölkənin bank sektorunun, eləcə də kiçik və orta sahibkarlığın inkişafına böyük töhfə verəcəyini vurğulayıblar.