Azərbaycan İnvestisiya Holdinqi və “L’İMAD” arasında strateji əməkdaşlıq sazişi imzalandı- FOTOLAR

Sentyabrın 14-də Azərbaycan İnvestisiya Holdinqi (AİH) və Əbu-Dabi Hökumətinin suveren investoru olan “L’İMAD” ikitərəfli iqtisadi əlaqələri möhkəmləndirmək məqsədilə strateji əməkdaşlıq Sazişi imzalayıblar.

hadiseler.info xəbər verir ki, saziş Azərbaycan Prezidenti İlham Əliyevin və Birləşmiş Ərəb Əmirliklərinin (BƏƏ) milli təhlükəsizlik müşaviri Şeyx Tahnun bin Zayed Al Nəhyanın iştirakı ilə iqtisadiyyat naziri Mikayıl Cabbarov və “L’İMAD”ın idarəedici direktoru Cassem Bu Ataba Al Zaabi tərəfindən imzalanıb.

Saziş çərçivəsində nəzərdə tutulan əsas məqamlar:

 Regional İnvestisiya: AİH və “L’İMAD” fondu Azərbaycanda və Mərkəzi Asiya regionunda birgə strateji investisiyaların qoyulmasını planlaşdırır.

 Prioritet Sahələr: Əməkdaşlıq sənaye, kritik faydalı qazıntılar, təchizat zəncirlərinin qurulması, şəhər və nəqliyyat infrastrukturu, energetika və rəqəmsal qoşulma istiqamətlərini əhatə edəcək.

 Uzunmüddətli Hədəflər: Tərəfdaşlıq uzunmüddətli kapitalın strateji sektorlara yönəldilməsini və regional inteqrasiyanın gücləndirilməsini hədəfləyir.

Tərəflər bu sazişin Azərbaycan ilə BƏƏ arasında sürətlə inkişaf edən iqtisadi əlaqələrin bariz nümunəsi olduğunu vurğulayıblar.