ADMİU-nun I kurs tələbələrini aşağılayan şəxslərlə bağlı polis araşdırmaya başlayıb

Azərbaycan Dövlət Mədəniyyət və İncəsənət Universitetinin (ADMİU) birinci kurs tələbələri ilə bağlı sosial mediada paylaşılan aşağılayıcı video geniş narazılığa səbəb olub.

hadiseler.info “Qafqazinfo”ya istinadən xəbər verir ki, “TikTok” sosial şəbəkəsində “leylakenan” adlı profildən canlı yayıma çıxan şəxslər universitetə yeni qədəm qoyan gənclərin ünvanına aşağılayıcı ifadələr işlədiblər. Yayımdakı şəxslər tələbələri hədələyərək onlara fiziki xəsarət yetirəcəklərini bildirib, hətta əvvəlki illərdə də oxşar xəsarətlər yetirdiklərini iddia ediblər.

Daxili İşlər Nazirliyinin (DİN) Mətbuat xidmətinin əməkdaşı Lumu İsrəfilli verilən sorğuya cavab olaraq bildirib ki, polis məsələdən məlumatlıdır və hazırda faktla bağlı müvafiq araşdırma aparılır.