Azərbaycan avqustda xalça istehsalını 91 dəfə artırıb

Azərbaycanda xalça və xalça məmulatlarının istehsalında kəskin artım qeydə alınıb.

hadiseler.info xəbər verir ki, Dövlət Statistika Komitəsinin məlumatına əsasən, 2026-cı ilin yanvar-avqust aylarında ölkədə 105,7 min kvadratmetr xalça və xalça məmulatları istehsal olunub. Bu göstərici ötən ilin eyni dövrü ilə müqayisədə 48 dəfə çoxdur.

Təkcə avqust ayı ərzində isə 27,7 min kvadratmetr xalça və xalça məmulatları istehsal edilib ki, bu da illik müqayisədə 91 dəfə artım deməkdir.

Məlumatda həmçinin qeyd olunur ki, bu il sentyabrın 1-i vəziyyətinə sənaye müəssisələrinin anbarlarında 5,3 min kvadratmetr hazır məhsul ehtiyatı yaranıb.

Məlumat üçün bildirək ki, 2025-ci ildə ölkədə 3,6 min kvadratmetr xalça və xalça məmulatı istehsal olunmuşdu (2024-cü ilə nisbətən 6% artım).