Uşaqlarını məktəbə aparan ananı vəsiqəsiz sürücü vurdu – VİDEO

Türkiyənin Adana şəhərində iki övladını motosikletlə məktəbə aparan anaya qarşı ağır yol-nəqliyyat hadisəsi törədilib.

hadiseler.info xarici mediaya istinadən xəbər verir ki, Yüreğir rayonunun Levent prospektində 28 yaşlı Selin İnan iki uşağını məktəbə apararkən 16 yaşlı S.K.-nın idarə etdiyi üçtəkərli motosikletlə toqquşub. Qaydaları pozaraq səhv dönüş edən nəqliyyat vasitəsinin zərbəsindən ananın sürdüyü motosiklet əvvəlcə dirəyə çırpılıb, daha sonra yerə devrilib. Hadisə anı ərazidəki iş yerlərindən birinin təhlükəsizlik kamerası vasitəsilə saniyə-saniyə qeydə alınıb.

Qəzadan sonra zərərçəkən ana həyat yoldaşına xəbər verib. Hadisə yerinə gələn həyat yoldaşı yaralı ananı və qorxu keçirən iki uşağını xəstəxanaya aparıb. Müalicə alan Selin İnanın qabırğasında çat və əzələlərində əzilmə təsbit edilib. İlkin tibbi yardımdan sonra ailə üzvləri evə buraxılıb.

İddialara görə, qəzanı törədən S.K.-nın ailəsi əvvəlcə zərəri ödəyəcəklərini bildirərək şikayətçi olmamağı xahiş edib. Lakin bir gün sonra fikirlərindən daşınaraq “Zərərinizi ödəməyəcəyik. Gedin, hara istəyirsiniz şikayət edin, biz aşirətik” deyərək ailəni təhdid ediblər.

Təhdidlərdən sonra Selin İnan polis bölməsinə gedərək rəsmi şikayətçi olub. Motosikletinə 17 min lirə ziyan dəydiyini bildirən ana, sürücülük vəsiqəsi olmayan şəxslərin cəzalandırılmasını tələb edir.