Prezident: “Bu gün iki mühüm müqavilə imzalanacaq”

Bakıda keçirilən II Azərbaycan Beynəlxalq İnvestisiya Forumu çərçivəsində təşkil olunan “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda tədbirdə Prezident İlham Əliyev vacib bəyanatlar verib.

hadiseler.info xəbər verir ki, dövlət başçısı energetika və neft-qaz sahəsində iki mühüm müqavilənin imzalanacağını açıqlayıb:

 Abşeron yatağı: “Abşeron” yatağının ikinci mərhələsinin işlənməsi haqqında müqavilə imzalanacaq. Bu layihə 3-4 ildən sonra Azərbaycanda qaz hasilatının əlavə 5 milyard kubmetr artmasını təmin edəcək.

 “Exxon” ilə əməkdaşlıq: “Exxon” şirkəti ilə Azərbaycanda böyük potensiala malik qeyri-ənənəvi neft və qaz ehtiyatlarının işlənməsi üzrə saziş imzalanacaq. Kəşfiyyat işləri uğurlu olarsa, bu, ölkədə yeni neft-qaz bumuna səbəb ola bilər.

Prezident İlham Əliyev qalıq yanacaqlara münasibətdə tendensiyanın dəyişdiyini qeyd edərək Prezident Trampa təşəkkürünü bildirib. Dövlət başçısı həmçinin qeyd edib ki, enerji artıqlığı imkan verir ki, bu üstünlük süni intellekt, data mərkəzləri və rəqəmsal inkişaf üçün istifadə olunsun. Hazırda ölkəmizdə 250 meqavat gücündə enerji saxlama sistemlərinin olduğu və elektrik enerjisinin Avropaya ixracının enerji təhlükəsizliyini daha da möhkəmləndirəcəyi vurğulanıb.