Netanyahudan “Flydubai” insidenti ilə bağlı rəsmi bəyanat: Pilot radikal təsirə məruz qalıb

İsrail hökumətinin qənaətinə görə, “Flydubai” aviaşirkətinin gəmi komandirinə hücum edən ikinci pilot radikal ideologiyanın təsirinə məruz qalıb və intihara meyilli vəziyyətdə olub.

hadiseler.info xəbər verir ki, bu barədə İsrailin Baş naziri Benyamin Netanyahu “Fox News”a müsahibəsində bildirib.

Hökumət başçısı qeyd edib ki, cinayətkarın əsas məqsədi təyyarəni qəzaya uğratmaq olub: “Onun radikal ideoloji təsir altına düşdüyü bizə məlumdur. Biz bu nəticələrə onun şəxsi məlumatları əsasında gəlmişik”.

İsrailin xüsusi xidmət orqanları təyyarədəki insidentin səbəbkarının hər hansı bir qruplaşma ilə birbaşa əlaqəsinin olmadığını və təkbaşına hərəkət etdiyini ehtimal edirlər.

Xatırladaq ki, sentyabrın 30-da səhər saatlarında “Flydubai” şirkətinə məxsus təyyarə əvvəlcə qəza siqnalı, daha sonra isə təyyarənin qaçırılması zamanı tətbiq edilən xüsusi kodu yayımlayıb. Pilotlar arasında baş verən insident nəticəsində layner kəskin şəkildə hündürlüyü azaldaraq kursunu dəyişib. İkinci pilot kapitanı soyuq silahla yaralayaraq təyyarəni qəzaya uğratmağa cəhd göstərib. Hava gəmisi Səudiyyə Ərəbistanı ərazisinə təhlükəsiz ensə də, quyruq nahiyəsi zədələnib.