Abşeronda yaşayış binasında partlayış baş verib- VİDEO

Abşeron rayonunun Şəfəq qəsəbəsində yerləşən çoxmərtəbəli yaşayış binasında partlayış baş verib.

hadiseler.info xəbər verir ki, bu barədə Fövqəladə Hallar Nazirliyi (FHN) məlumat yayıb. Məlumat daxil olan kimi əraziyə dərhal FHN-in Dövlət Yanğından Mühafizə Xidmətinin qüvvələri cəlb olunub.

Hadisə yerində əməliyyat şəraitinin qiymətləndirilməsi zamanı yeddimərtəbəli yaşayış binasının 3-cü mərtəbəsində yerləşən, ümumi sahəsi 62 kv.m olan 2 otaqlı mənzildə yanğınla müşayiət olunan partlayışın baş verdiyi müəyyən edilib.

Partlayış nəticəsində mənzilə ciddi ziyan dəyib, 1 kv.m sahədə ev əşyaları yanıb və 1 nəfər müxtəlif dərəcəli xəsarət alıb.

FHN-in qüvvələri tərəfindən ərazidə operativ şəkildə zəruri təhlükəsizlik tədbirləri həyata keçirilib.

Hadisə ilə bağlı aidiyyəti qurumlar tərəfindən araşdırma aparılır.