Bakıda fərdi evdə uçqun: 1 ölü, 1 yaralı — VİDEO

Bakının Suraxanı rayonunda yaşayış evində bədbəxt hadisə baş verib.

hadiseler.info xəbər verir ki, Fövqəladə Hallar Nazirliyinin verdiyi məlumata görə, hadisə Bahar qəsəbəsi ərazisində qeydə alınıb.

Əraziyə dərhal FHN-in Xüsusi Riskli Xilasetmə Xidmətinin xilasediciləri cəlb olunub. Hadisə yerində əməliyyat şəraitinin qiymətləndirilməsi zamanı tikilməkdə olan fərdi yaşayış evində beton plitələrin uçması nəticəsində insanların dağıntı altında qaldığı müəyyən edilib.

Xilasedicilər xüsusi texniki vasitələrin köməyi ilə dağıntı altında qalan 1966-cı il təvəllüdlü Xəlil Şərif oğlu Mehdiyevi müxtəlif dərəcəli bədən xəsarətləri ilə sağ çıxarıblar. Digər vətəndaş, 1969-cu il təvəllüdlü Cəlil Şərif oğlu Mehdiyevin isə meyiti dağıntılar altından çıxarılaraq aidiyyəti üzrə təhvil verilib.

Hazırda hadisə ilə bağlı aidiyyəti qurumlar tərəfindən geniş araşdırma aparılır.