Prezident: “İnsan talelərinə aid məlumatlar siyasi şərtləndirmə predmeti olmamalıdır”

Azərbaycan Respublikasının Prezidenti İlham Əliyev “İtkin düşmüş şəxslər üzrə Bakı Dialoqu çərçivəsində IV Beynəlxalq Konfrans”ın iştirakçılarına müraciət ünvanlayıb.

hadiseler.info xəbər verir ki, dövlət başçısı müraciətində insan talelərinə aid məlumatların siyasi şərtləndirmə predmeti olmamalı olduğunu vurğulayıb.

Prezident qeyd edib ki, itkin düşmüş şəxslərin axtarışlarının səmərəliliyi dəqiq məlumatların əldə olunmasından bilavasitə asılıdır. İlham Əliyev Ermənistanın itkin düşmüş azərbaycanlıların taleyi, kütləvi və fərdi dəfn yerləri barədə bütün məlumatları təqdim etməli, müvafiq arxivlərin açılmasına və şahid ifadələrinin toplanmasına şərait yaratmalı olduğunu diqqətə çatdırıb. Dövlət başçısı bunun hüquqi öhdəlik və humanitar məsuliyyət olmaqla yanaşı, sülhə sadiqliyin əməli ifadəsi və qarşılıqlı etimadın möhkəmləndirilməsinə mühüm töhfə olacağını bildirib.

Müraciətdə həmçinin Azərbaycanın 2002-ci ildən etibarən BMT Baş Assambleyasında itkin düşmüş şəxslərlə bağlı qətnamə təşəbbüsləri ilə çıxış etdiyi xatırladılaraq, BMT və digər beynəlxalq təşkilatların bu istiqamətdə daha fəal olmalarının zəruriliyi qeyd olunub.