Zəngilan şəhərinin işğaldan azad edilməsindən 6 il ötür

Bu gün Zəngilan şəhərinin Ermənistan silahlı qüvvələrinin işğalından azad olunmasından altı il ötür.

hadiseler.info xəbər verir ki, 2020-ci il oktyabrın 20-də Müzəffər Azərbaycan Ordusu Vətən müharibəsində növbəti tarixi qələbəsini qazanaraq Zəngilan şəhərini və rayonun bir neçə kəndini düşməndən təmizləyib.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev xalqa müraciətində və “X” sosial şəbəkə hesabındakı paylaşımında bu şad xəbəri elan edib:

“Rəşadətli Azərbaycan Ordusu tərəfindən Füzuli rayonunun Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı, Cəbrayıl rayonunun Safarşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli, Xocavənd rayonunun Ağcakənd, Mülküdərə, Daşbaşı, Günəşli, Çinarlı, Zəngilan rayonunun Havalı, Zərnəli, Məmmədbəyli, Həkəri, Şərifan, Muğanlı kəndləri və Zəngilan şəhəri işğaldan azad edilib. Eşq olsun Azərbaycan xalqına! Qarabağ Azərbaycandır!”

Zəngilanın azad edilməsi 44 günlük Vətən müharibəsinin strateji və hərbi baxımdan ən mühüm dönüş nöqtələrindən biri olub. Rayonun azad olunması həm də Azərbaycan-Ermənistan dövlət sərhədinin bərpası istiqamətində həlledici addım idi.

Xatırladaq ki, Prezident İlham Əliyevin 31 iyul 2023-cü il tarixli Sərəncamına əsasən, 20 oktyabr tarixi təntənəli şəkildə Zəngilan Şəhəri Günü kimi qeyd edilir.