Türkiyədə sabiq nazir həbs edildi

Türkiyədə İstanbul Baş Prokurorluğunun apardığı kapital bazarları araşdırması çərçivəsində keçmiş ailə və sosial siyasət naziri Fatma Betül Sayan Kaya həbs olunub.

hadiseler.info xəbər verir ki, sabiq nazir “kapital bazarı qanununu pozmaq” və “cinayət törətmək üçün yaradılmış təşkilata üzvlük” ittihamları ilə üzləşib. Terrorizmin Maliyyələşdirilməsi və Çirkli Pulların Yuyulması Cinayətlərinin İstintaq Bürosunda 2 saat 15 dəqiqə davam edən ifadəsindən sonra məhkəməyə göndərilən keçmiş nazir barəsində qaçış və sübutların saxtalaşdırılması riski nəzərə alınaraq həbs qətimkan tədbiri seçilib.

İstintaq materiallarına əsasən, Kayanın “Özata Denizcilik” (OZATD) səhmləri ilə bağlı “Tera Qrup” rəhbərləri ilə intensiv əlaqədə olduğu və bazarın qiymətinə təsir edə biləcək məlumatlara sahib olaraq səhmləri ləğvetmə qərarından bir gün əvvəl sürətli şəkildə nağdlaşdırdığı müəyyən edilib. Eyni araşdırma çərçivəsində digər şübhəlilər – İlyas Kaya və Kapital Bazarları Şurasının keçmiş sədri İbrahim Ömər Gönül barəsində isə məhkəmə nəzarəti tədbirləri tətbiq olunub.