Xaçmazda imtahana buraxılmayan abituriyent itkin düşüb

Xaçmaz rayonunun Həsənqala kənd sakini, bu il orta məktəbi başa vuran Polad Rasim oğlu Poladovun itkin düşdüyü bildirilir.

Milli.Az-ın bizim.media-ya istinadən verdiyi məlumata görə, o, iyulun 12-də Xaçmaz şəhərində I ixtisas qrupu üzrə qəbul imtahanında iştirak etmək üçün imtahan binasına gəlib. Lakin üzərində mobil telefon aşkar edildiyi üçün qüvvədə olan qaydalara əsasən imtahana buraxılmayıb.

Yaxınlarının sözlərinə görə, ailəsinin ondan yüksək nəticə gözləməsi gəncin psixoloji vəziyyətinə mənfi təsir göstərib. Hadisədən sonra onun naməlum istiqamətdə getdiyi və bir daha geri qayıtmadığı bildirilir.

Polad Poladovla bağlı Xaçmaz Rayon Polis Şöbəsində rəsmi itkin düşmə faktı qeydə alınıb. Hazırda hüquq-mühafizə orqanları onun tapılması istiqamətində axtarış tədbirlərini davam etdirir.