Oğul mübahisə zəminində anasının üstünə benzin tökərək yandırdı

Abşeron rayonunda ailə münaqişəsi zəminində ağır cinayət törədilib, 21 yaşlı oğul anasını yandıraraq öldürüb.

hadiseler.info Bakıvaxtı.az-a istinadən xəbər verir ki, hadisə rayonun Hökməli qəsəbəsində qeydə alınıb.

Məlumata görə, qəsəbə sakini, 2005-ci il təvəllüdlü Abdurrəhman Həsənli atası, anası və iki bacısı ilə bir evdə yaşayıb. Ailədə valideynlər arasında mütəmadi olaraq dini məsələlər, xüsusilə atanın tətbiq etdiyi şəriət qaydalarına riayət olunması səbəbindən mübahisələr yaşanıb. Ana və iki qızı həmin qaydalara əməl etmədikdə, Abdurrəhman atasının tərəfini tutaraq onları günahlandırıb.

Mübahisə zamanı qadının evin satılaraq iki yerə bölünməsini tələb etməsi, ata və oğulun isə bunu rədd etməsi gərginliyi daha da artırıb. Əsəbiləşən Abdurrəhman evə və anasının üstünə benzin tökərək od vurub. Ağır xəsarətlər alan qadın xəstəxanaya çatdırılsa da, onun həyatını xilas etmək mümkün olmayıb.

Polis əməkdaşlarının keçirdikləri tədbirlərlə cinayəti törətməkdə şübhəli bilinən A.Həsənli saxlanılıb. Faktla bağlı başlanan cinayət işi məhkəməyə göndərilib və məhkəmənin hökmü ilə Abdurrəhman 17 il 6 ay müddətinə azadlıqdan məhrum edilib.