Rusiyada miqrantlar üçün YENİ QƏRAR — Qaydalar sərtləşdirildi

Rusiya Federasiyası Dövlət Dumasının spikeri Vyaçeslav Volodin avqustun 6-dan etibarən xarici vətəndaşlara sim-kart satışı qaydalarını ağırlaşdıran federal qanunun qüvvəyə minəcəyini bəyan edib.

Hadisələr.info “Oxu.Az”a istinadən xəbər verir ki, parlament sədri bu barədə sosial şəbəkə hesabında paylaşım edib.

Yenilənmiş sənədə əsasən, mobil cihazın IMEI kodu göstərilmədən və ya saxta məlumatlar daxil edilməklə rabitə xidməti müqaviləsinin bağlanması cinayət məsuliyyəti daşıyacaq. Bundan sonra əcnəbilər və ya vətəndaşlığı olmayan şəxslərlə müqavilə rəsmiləşdirilərkən qanun pozuntusuna yol verilməsi birbaşa cinayət tərkibi yaradacaq.

V.Volodin bildirib ki, qanunu pozan şəxsləri 500 000 rubladək cərimə və ya 1 ilədək azadlıqdan məhrumetmə cəzası gözləyir. Bu addım mobil cihazların IMEI kodları bazasının formalaşdırılmasını nəzərdə tutan “Antifrod 2.0” tədbirlər çərçivəsində atılır. Operatorlar və dövlət qurumları tərəfindən idarə olunacaq bu baza fırıldaqçıların istifadə etdiyi sim-kartları sürətlə aşkarlamağa imkan verəcək.

Xatırladaq ki, Rusiyada əcnəbilərin sim-kart əldə etməsi prosesi artıq çətinləşdirilib. Bir xarici vətəndaş öz adına (korporativ nömrələr daxil olmaqla) maksimum 10 telefon nömrəsi rəsmiləşdirə bilər. Müqavilə bağlamaq üçün isə SNİLS, “Qosusluqi” hesabı və biometrik göstəricilərlə şəxsiyyətin təsdiqi tələb olunur.