Azərbaycanda onlayn bilet alanların sayı 2 dəfə artdı – AYNA-dan rəsmi açıqlama

Cari ilin yanvar-iyul ayları ərzində “biletim.az” portalı üzərindən 700 598 ədəd onlayn bilet əldə olunub.

Hadisələr.info Azərbaycan Yerüstü Nəqliyyat Agentliyinə (AYNA) istinadən xəbər verir ki, bu rəqəm ötən ilin eyni dövrü ilə müqayisədə təxminən 2 dəfə artım deməkdir.

İlin ilk 7 ayında ümumi bilet satışında onlayn biletlərin payı 42 faizə yüksəlib. Müqayisə üçün qeyd edək ki, ötən ilin analoji dövründə bu göstərici 27,4 faiz təşkil edirdi. Bununla yanaşı, qabaqcadan bilet satışı üzrə xüsusi çəki ötən ilin yanvar-iyul aylarındakı 35 faizdən cari ilin müvafiq dövründə 48 faizə çatıb.

Məlumat üçün bildirək ki, hazırda “biletim.az” platformasında 58 məntəqə üzrə 94 istiqamətə bilet almaq mümkündür. Ümumilikdə sistemə 372 reys üzrə 420 nəqliyyat vasitəsi inteqrasiya edilib. Onlayn bilet satışı mexanizminin mərhələli şəkildə ölkə üzrə sərnişindaşıma fəaliyyəti göstərən bütün daşıyıcıları və avtovağzal komplekslərini əhatə edəcəyi planlaşdırılır.