Gəncədə məhkəmə hökmü: İki vəkil barəsində azadlıqdan məhrumetmə qərarı çıxarıldı

Gəncə Şəhər Məhkəməsində iki vəkil barəsində aparılan cinayət işi üzrə məhkəmə prosesi başa çatıb və hökm elan edilib.

Hadisələr.info “Gununsesi.info”ya istinadən xəbər verir ki, Tovuz Vəkil Bürosunun vəkilləri – Rəşad Tapdıq oğlu Abdullayev və Süleyman Hüseynqulu oğlu Əliyev barəsində cinayət işinə baxılıb.

Məhkəmənin çıxardığı hökmə əsasən, Rəşad Abdullayev 3 il 7 ay, Süleyman Əliyev isə 3 il 3 ay müddətinə azadlıqdan məhrum edilib.

Qeyd edək ki, vəkillər Azərbaycan Respublikası Cinayət Məcəlləsinin 312-1-ci (Nüfuz alveri – vəzifəli şəxsin qərarına qanunsuz təsir göstərmə), 297-ci (Bilə-bilə yalan ifadə vermə, yalan rəy vermə və ya yanlış tərcümə etmə) və 320-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma və ya saxta sənədlərdən istifadə etmə) maddələri ilə təqsirli biliniblər. İki il davam edən istintaq materialları baxılması üçün Gəncə Şəhər Məhkəməsinə göndərilmişdi.