“Yalama” sərhəd komendantlığı istifadəyə verildi

Dövlət sərhədlərinin etibarlı mühafizəsinin təşkili və sərhədçilərin xidmət şəraitinin yaxşılaşdırılması istiqamətində növbəti mühüm addım atılıb.

hadiseler.info xəbər verir ki, Dövlət Sərhəd Xidmətinin (DSX) Sərhəd Qoşunlarının “Xudat” Sərhəd Dəstəsinin xidməti ərazisində əsaslı təmir edilən “Yalama” sərhəd komendantlığı şəxsi heyətin istifadəsinə verilib.

Təntənəli açılış mərasimində işğaldan azad edilmiş ərazilərimizdə həyata keçirilən genişmiqyaslı bərpa-quruculuq işlərinin uğurlu nəticələrindən bəhs olunub. Bildirilib ki, sərhəd bölmələrinin müasir standartlara uyğun infrastruktura malik olması və sosial-məişət şəraitinin yüksəldilməsi DSX-nin əsas prioritetlərindəndir.

Yenilənmiş infrastruktur idarəetmənin çevikliyini artırmağa, sərhəd naryadlarının fəaliyyətini səmərəli təşkil etməyə, eləcə də ehtimal olunan təhdidlərə dərhal və adekvat reaksiya verməyə geniş imkanlar yaradacaq.

Tədbirdən sonra DSX rəisinin müavini general-leytenant Cavid Abdullayev komendantlığın inzibati binasını gəzərək şəxsi heyət üçün yaradılmış şəraitlə yaxından tanış olub.