Təbiətə 39 min manatdan çox ziyan dəyib

Bakının Binəqədi rayonu, Biləcəri qəsəbəsində ağacların qanunsuz kəsilməsi faktı aşkar edilib.

hadiseler.info xəbər verir ki, Dövlət Ekoloji Təhlükəsizlik Xidmətinin apardığı araşdırma zamanı yaşıllıqların məhv edilməsi nəticəsində təbiətə ümumilikdə 39 min 240 manat ziyan vurulduğu məlum olub.

Dəymiş ziyanın məbləği cinayət məsuliyyəti yaratdığı üçün toplanan sənədlər hüquqi qiymət verilməsi məqsədilə Baş Prokurorluğa təqdim olunacaq.

Həmçinin, Dövlət Ekoloji Ekspertiza Agentliyinin icazəsi olmadan söküntü işləri apardığı üçün torpaq sahibi Yusif Xudaverdiyev barəsində akt və protokol tərtib edilib, müvafiq tədbirlər görülüb.

Kəsilmiş ağacların əvəzinə yenilərinin əkilməsi üçün Bakı Şəhər İcra Hakimiyyətinin Yaşıllaşdırma Təsərrüfatı Birliyinə müraciət olunub. Ərazidə hər hansı layihə həyata keçiriləcəyi təqdirdə, həmin sahənin yaşıllıq zonası kimi nəzərə alınması üçün Bakı Şəhər Memarlıq və Şəhərsalma Baş İdarəsi də məlumatlandırılıb.