Bakıda üç nəfər kirayə qaldıqları evdə bıçaqlanıb

Bakının Xətai rayonunda üç nəfərin xəsarət alması ilə nəticələnən qanlı hadisə baş verib.

hadiseler.info Teleqraf.az-a istinadən xəbər verir ki, hadisə Əhmədli qəsəbəsində yerləşən fərdi yaşayış evlərindən birində qeydə alınıb. Balakən rayon sakinləri — 1983-cü il təvəllüdlü Sərvər Kərimov, 1986-cı il təvəllüdlü Vidadi Bubuşov və 1988-ci il təvəllüdlü Elnur Xocaxov kirayədə yaşadıqları evdə bıçaq xəsarətləri alıblar. Hər üç şəxs dərhal xəstəxanaya yerləşdirilib.

Xətai Rayon Polis İdarəsinin əməkdaşları tərəfindən aparılan ilkin araşdırmalar zamanı məlum olub ki, xəsarət alanlar birlikdə spirtli içki qəbul edərkən aralarında mübahisə düşüb. Münaqişə zəminində onları birlikdə kirayədə yaşadıqları şəxs bıçaqlayıb.

Polis əməkdaşlarının keçirdiyi əməliyyat-axtarış tədbirləri nəticəsində əməli törətməkdə şübhəli bilinən, əvvəllər məhkum olunmuş 1989-cu il təvəllüdlü Murad Quliyev saxlanılaraq istintaqa təhvil verilib.

Faktla bağlı araşdırma aparılır.