ARB TV xəbər kanalına çevrilir – Şou verilişləri ləğv olunur

ARB TV yeni mövsümdən etibarən yayım konsepsiyasında köklü dəyişiklik etməyə hazırlanır.

Əldə edilən məlumata əsasən, telekanal yeni mövsümdən tam olaraq xəbər kanalı formatında fəaliyyət göstərəcək. Dəyişikliyə əsasən, yayım torundan şou və əyləncəli proqramlar çıxarılaraq, əsas diqqət operativ xəbərlərə, analitik verilişlərə və canlı məlumat axınına yönəldiləcək.

Yeniliklər çərçivəsində regional xəbər şəbəkəsinin də fəaliyyətinin genişləndirilməsi planlaşdırılır. Ölkənin müxtəlif bölgələrindən gün ərzində 3 dəfə mütəmadi canlı bağlantıların reallaşdırılması nəzərdə tutulub.

Məsələ ilə bağlı telekanala ünvanlanan sorğuya cavab olaraq verilən məlumatda deyilənlər təkzib olunmayıb. Bildirilib ki, yeniliklərlə bağlı ətraflı açıqlama növbəti mövsümdə ictimaiyyətə təqdim olunacaq.