Viktor Yuşenko Şəhidlər xiyabanını ziyarət edib  

Ukraynanın sabiq Prezidenti Viktor Yuşenko Bakıya səfəri çərçivəsində rəsmi görüşlərlə yanaşı, Azərbaycan paytaxtının bir sıra mədəni və tarixi məkanlarını ziyarət edib.  

hadiseler.info Ukraynanın Azərbaycandakı səfiri Yuri Qusevin sosial şəbəkə bəyanatına istinadən xəbər verir ki, V.Yuşenko Şəhidlər xiyabanını ziyarət edib, həmçinin Birinci Qarabağ müharibəsi zamanı həlak olmuş ukraynalı təyyarəçi, Azərbaycanın Milli Qəhrəmanı Viktor Seryoginin xatirəsini anıb.  

Səfər çərçivəsində eks-prezident “Suraxanı” gəmi-muzeyində olub və orada Ukraynanın birinci xanımı Yelena Zelenskayanın təşəbbüsü ilə yaradılmış audio-video irslə tanış olub. O, həmçinin Bakıdakı Ukrayna Mərkəzində Azərbaycan Fotoqrafları Birliyi ilə birgə təşkil edilən “Müharibə obyektivin gözü ilə” adlı foto-sərginin açılışında iştirak edib.

Diplomat Yuşenkonun Azərbaycan Prezidenti İlham Əliyevlə görüşdüyünü və tərəflərin ikitərəfli strateji tərəfdaşlıq, ticari-iqtisadi və humanitar əlaqələri müzakirə etdiklərini xatırladaraq, Bakı səfərinin artıq başa çatdığını diqqətə çatdırıb.