Türkiyədə dəhşətli hadisə: İki bacı uçurumdan aşaraq həlak oldu

Türkiyənin Ordu vilayətinin Çamaş rayonunda baş verən bədbəxt hadisə nəticəsində iki bacı faciəvi şəkildə həyatını itirib.

hadiseler.info Türkiyə mediasına istinadən xəbər verir ki, faciə Sarıyaqub məhəlləsində qeydə alınıb. Bağçaya gedən 60 yaşlı Məlahət Gümüş və onun 65 yaşlı bacısı Fatma Gümüşdən uzun müddət xəbər ala bilməyən yaxınları və kənd sakinləri axtarışlara başlayıblar.

Axtarışlar nəticəsində hər iki bacının cansız bədəni dərə yatağında aşkarlanıb. Əraziyə cəlb olunan təcili tibbi yardım və jandarma əməkdaşları onların hadisə yerində dünyasını dəyişdiyini müəyyən ediblər.

İlkin ehtimallara görə, bacıların bağçada olarkən müvazinətlərini itirərək uçurumdan dərəyə yıxıldıqları bildirilir. Faktla bağlı hüquq-mühafizə orqanları tərəfindən araşdırma aparılır, dəqiq ölüm səbəbi məhkəmə-tibbi ekspertizasından sonra bəlli olacaq.