57 ticarət obyektində aksizli mallarla bağlı pozuntular aşkarlandı – FOTO

İqtisadiyyat Nazirliyi yanında Dövlət Vergi Xidməti, AQTA və digər aidiyyəti dövlət orqanları ilə birgə aksizli malların dövriyyəsinə nəzarət məqsədilə kompleks tədbirlər həyata keçirib.

hadiseler.info xəbər verir ki, avqust ayı ərzində Bakıda və respublikanın rayonlarında yerləşən topdan, pərakəndə ticarət və ictimai iaşə obyektlərində keçirilən yoxlamalar zamanı 57 ticarət obyektində aksiz markası və ya məcburi nişanlaması olmayan, habelə saxta markalı malların satışı müəyyən edilib.

Keçirilən əməliyyatlar nəticəsində:

 6 192 ədəd (4.3 min litr) alkoqollu içki,

 132 çəlləkdə (4.98 min litr) pivə,

 99 qutu tütün məmulatı dövriyyədən çıxarılıb.

Bundan əlavə, Kürdəmir rayonunda qanunsuz işləyən gizli sexdə 1 288 ədəd saxta aksiz markası, 25 min litr mənşəyi məlum olmayan spirtli içki materialı və istehsal avadanlıqları aşkarlanıb.

Dövlət Vergi Xidməti bildirir ki, istehlakçılar saxta məhsulları “E-Vergi” tətbiqindəki “Təqib və İzləmə Sistemi” vasitəsilə QR-kodları skan edərək yoxlaya və aşkar olunan pozuntular barədə elektron müraciət edə bilərlər.