ŞKTC-də gəmi qəzası ilə bağlı 3 Azərbaycan vətəndaşı saxlanılıb

Şimali Kiprin Girne sahillərində 8 nəfərin ölümü ilə nəticələnən gəmi qəzası ilə bağlı aparılan istintaq çərçivəsində saxlanılanlar arasında 3 Azərbaycan vətəndaşı da var.

hadiseler.info xəbər verir ki, həmin şəxslər Xaçmaz rayon sakini Valeh Hümbətov (28 yaş), əslən Tərtərdən olan Rəşad İbrahimov (2006-cı il təvəllüdlü) və Şabran rayonundan olan Qədir Quliyevdir (22 yaş). Ailə üzvlərinin verdiyi məlumata görə, hər üç şəxs gəmidə matros kimi fəaliyyət göstərib və qəzadan dərhal sonra yaxınları ilə qısa əlaqə saxlayaraq sağ olduqlarını bildiriblər.

Saxlanılan şəxslərin işə düzəldiyi şirkətdən və vəkillərdən verilən məlumata görə, həbs insan tələfatının çox olması ilə bağlı həyata keçirilən standart prosedurdur. Şəxslər vəkillə təmin olunub və istintaq çərçivəsində izahatlarının alınması prosesi davam edir.

Xatırladaq ki, avqustun 30-da Şimali Kiprin Girnə sahillərində baş verən gəmi qəzası nəticəsində 240 nəfər xilas edilib, 8 nəfər həyatını itirib. 19 sərnişinin axtarış-xilasetmə işləri isə davam etdirilir.