Cənubi Koreya Hörmüz boğazına hərbi qüvvə göndərməyə hazırlaşır

Cənubi Koreya Hörmüz boğazında gəmilərin sərbəst və təhlükəsiz hərəkətini təmin etmək məqsədilə regiona hərbi qüvvələr yerləşdirməyə hazırlaşır. Hərbi bölmələrin ilin sonunadək bölgəyə göndərilməsi planlaşdırılır.

hadiseler.info xəbər verir ki, bu barədə “Reuters” agentliyi hökumət və hərbi mənbələrə istinadən bilgi paylaşıb.

Məlumata görə, hazırda hökumət parlamentin təsdiqini almaq üçün müvafiq hüquqi prosedurları davam etdirir. Rəsmilər dəniz patrul təyyarəsinin, maddi-texniki təminat gəmisinin və ya minatəmizləmə qrupunun göndərilməsi kimi bir neçə imkanı nəzərdən keçirirlər.

Cənubi Koreya hökuməti boğazda gəmiçiliyin təhlükəsizliyinə dəstək verməyin praktiki yollarının müzakirə olunduğunu təsdiqləsə də, yekun qərarın verilməsi ilə bağlı xəbərlərin tam faktları əks etdirmədiyini bildirib. Missiyanın dəqiq tərkibi və vaxtı barədə son qərar hələlik qəbul edilməyib.