Ali məktəblərdə boş qalan plan yerlərinin sayı açıqlandı

Dövlət İmtahan Mərkəzi (DİM) ixtisas qrupları üzrə ali təhsil müəssisələrində boş qalan plan yerlərinin sayını və müsabiqə şərtlərini açıqlayıb.

hadiseler.info xəbər verir ki, boş qalan plan yerlərinin müsabiqəsinə ümumi balı 200-dən, imtahanın ikinci mərhələsi üzrə balı 100-dən az olmayan abituriyentlər buraxılırlar.

İxtisas qrupları üzrə mövcud vəziyyət aşağıdakı kimidir:

 I ixtisas qrupu: RK altqrupu üzrə müsabiqədə iştirak edib qəbul ola bilməyən 12 nəfər, Rİ altqrupu üzrə isə 416 nəfər var. RK altqrupunda 150/50 bal şərtini ödəyən 447 abituriyent var. Rİ altqrupunda 150/50 bal şərtini ödəyən abituriyentlər üçün boş plan yeri qalmayıb.

 II ixtisas qrupu: 395 plan yeri boş qalıb. 200/100 bal şərtini ödəyərək qəbul ola bilməyən 29 nəfər, 150/50 bal şərtini ödəyən isə 51 abituriyent var.

 III ixtisas qrupu: 25 plan yeri (hamısı DT altqrupu üzrə) boş qalıb. DT altqrupu üzrə qəbul ola bilməyən 3379 nəfər var. Abituriyentlərin seçə biləcəyi yalnız bir ixtisas – Kitabxanaçılıq və informasiya (ingilis dilində) üzrə 5 boş yer mövcuddur. 150/50 bal toplayanlar üçün boş yer qalmayıb.

 IV ixtisas qrupu: 407 plan yeri boş qalıb. 200/100 bal şərtini ödəyib qəbul ola bilməyən 138 nəfər, 150/50 bal toplayan isə 161 abituriyent var. Bu şəxslər yalnız Bağçılıq və tərəvəzçilik (ingilis dilində) və Su bioehtiyatları və akvakultura ixtisaslarını seçə bilərlər.

 V ixtisas qrupu: 288 plan yeri boş qalıb. Bu yerlərin seçimində xüsusi qabiliyyət tələb edən ixtisaslar üzrə müsabiqə şərtlərini ödəmiş abituriyentlər iştirak edə bilərlər.