Ali Məhkəmədən faizlə borc verənlərə XƏBƏRDARLIQ

Azərbaycan Respublikası Ali Məhkəməsi faiz müqabilində borc verən şəxslərə hüquqi risklərlə bağlı sərt xəbərdarlıq edib.

hadiseler.info xəbər verir ki, Ali Məhkəmənin açıqlamasında fiziki şəxslər arasında tək-tük faizlə borc verilməsinin qanunla qadağan edilmədiyi, lakin bu fəaliyyətin müntəzəm və gəlir əldə etmək məqsədilə sistemli hal almasının ciddi hüquqi məsuliyyət yaratdığı vurğulanıb.

Mülki Məcəllənin 740.10-cu maddəsinə əsasən, gəlir əldə etmək məqsədilə müntəzəm olaraq və qeyri-məhdud şəxslərə borc verilə bilməsi yalnız lisenziyası olan kredit təşkilatlarına həvalə edilib. Bu qaydanı pozan fiziki şəxslərin fəaliyyəti qanunsuz sahibkarlıq kimi qiymətləndirilə və inzibati, hətta cinayət məsuliyyətinə səbəb ola bilər.

Xəbərdarlıqda qeyd olunub ki, pulunu geri ala bilməyib məhkəməyə müraciət edən borc verən şəxs öz fəaliyyətinin araşdırılması riski ilə üzləşə bilər. Məhkəmə fəaliyyətdə qanunsuz sahibkarlıq əlamətləri aşkar edərsə, xüsusi qərardadla materialları prokurorluğa göndərə bilər. Həmçinin, bu halda borc verənin müqavilədəki faizləri tələb etmək imkanı məhdudlaşaraq yalnız illik 5 faizlə əvəzlənə bilər.

Ali Məhkəmə vətəndaşlara borc münasibətlərini mütləq yazılı rəsmiləşdirməyi və ödənişləri bank vasitəsilə həyata keçirməyi tövsiyə edir.