Ali Məhkəmədən onlayn kreditlərlə bağlı mühüm xəbərdarlıq

Ali Məhkəmə vətəndaşın xəbəri olmadan rəsmiləşdirilən onlayn kreditlər üzrə hüquqi məsuliyyət barədə geniş izah verib.

hadiseler.info xəbər verir ki, son illərdə bank xidmətlərinin rəqəmsallaşması nəticəsində məsafədən kredit verilməsi geniş yayılsa da, bu proses yeni hüquqi risklər yaradıb.

Mərkəzi Bankın qaydalarına əsasən, banklar onlayn xidmət göstərərkən gücləndirilmiş elektron imza, videozəng, üz tanınması və birdəfəlik təsdiq kodu (OTP) kimi identifikasiya vasitələrindən istifadə edirlər. Lakin məhkəmə təcrübəsi göstərir ki, bəzi hallarda üçüncü şəxslər vətəndaşların fərdi məlumatlarını əldə edərək onların adından onlayn kredit rəsmiləşdirirlər.

Bir çox vətəndaş dələduzluq qurbanı olduğu üçün kredit borcuna görə məsuliyyət daşımadığını düşünsə də, Ali Məhkəmə bildirir ki, hər bir şəxs öz fərdi məlumatlarının (FIN kod, şəxsiyyət vəsiqəsi, OTP kodları, biometrik məlumatlar) qorunmasına görə cavabdehdir. Məhkəmə vurğulayır ki, təkcə dələduzluq faktının mövcudluğu kredit müqaviləsinin etibarsız sayılması üçün kifayət etmir; hər bir iş üzrə bankın qanunvericiliyə əməl etməsi və vətəndaşın öz hərəkətləri birgə qiymətləndirilir.

Ali Məhkəmənin tövsiyələri:

 FIN kodunuzu və şəxsiyyət vəsiqənizi naməlum şəxslərə verməyin;

 Biometrik məlumatlarınızın təhlükəsizliyini təmin edin və SMS təsdiq kodlarını heç kimlə paylaşmayın;

 Bank bildirişlərini izləyin və mobil nömrəniz dəyişdikdə banka dərhal məlumat verin;

 Şübhəli zəng və mesajlara etibar etməyin, hesablarınızı mütəmadi yoxlayın;

 Adınıza qanunsuz kredit rəsmiləşdirildikdə dərhal banka və hüquq-mühafizə orqanlarına müraciət edin.