ANAMA sədri: “Qarabağ və Şərqi Zəngəzur 1 milyondan çox mina ilə çirkləndirilib”

Qarabağ və Şərqi Zəngəzur iqtisadi rayonları ilkin qiymətləndirmələrə əsasən, 1 milyondan çox mina və partlayıcı sursatla çirkləndirilib.

hadiseler.info xəbər verir ki, bunu Azərbaycan Minatəmizləmə Agentliyinin (ANAMA) İdarə Heyətinin sədri Vüqar Süleymanov “Bakı İqlim Fəaliyyəti Həftəsi 2026” çərçivəsində keçirilən panel sessiyada bildirib.

ANAMA sədrinin sözlərinə görə, Azərbaycan minalardan ən çox çirkləndirilmiş ölkələr sırasındadır:

“İqlim dəyişikliyi selə, quraqlığa, meşə yanğınlarına səbəb olur. Lakin insanların yaşamağına mane yaradan təkcə bunlar deyil. Müharibələrdən sonra çirklənən ərazilər də buna aiddir. Minalar təkcə torpaqları deyil, suları da çirkləndirir. Həmçinin minalar işğaldan azad edilmiş ərazilərdə yolların salınması, yaşayış məntəqələri və evlərin tikilməsini gecikdirir”.

Vüqar Süleymanov vurğulayıb ki, mina təhlükəsi torpağın, suyun, biomüxtəlifliyin və bütövlükdə ekosistemin təhlükəsizliyinə təsir edən qlobal problemdir.

Diqqətə çatdırılıb ki, 44 günlük Vətən müharibəsinin başa çatmasından etibarən ANAMA və digər aidiyyəti qurumlar tərəfindən 300 565 hektar ərazi təmizlənib, 261 705 ədəd mina və partlayıcı sursat zərərsizləşdirilib. O cümlədən ekoloji qiymətləndirmə layihələri, milli parklar, dövlət təbiət yasaqlıqları və su hövzələri üzrə 31 037 hektar, kənd təsərrüfatı üçün 132 447 hektar, yaşayış infrastrukturu üçün 71 202 hektar, energetika sektoru üçün 12 443 hektar, meliorasiya layihələri üçün isə 8 447 hektar ərazi minalardan tam təmizlənib.

Agentlik rəhbəri əlavə edib ki, işğaldan azad edilmiş ərazilərə təhlükəsiz və dayanıqlı qayıdışın təminatı məqsədilə təhlükəli sahələrin təmizlənməsi ilə yanaşı, yüksək çirklənmə olan ərazilər konservasiya olunaraq çəpərlənir.