AQTA-dan xəbərdarlıq: 10 heyvan kəsimi məntəqəsində ciddi nöqsanlar aşkarlandı

Azərbaycan Qida Təhlükəsizliyi Agentliyi (AQTA) ölkə üzrə fəaliyyət göstərən heyvan kəsimi məntəqələrində keçirilən monitorinqlərin nəticələrini açıqlayıb.

hadiseler.info xəbər verir ki, respublika üzrə mövcud olan 98 kəsim məntəqəsindən 84-ü aktiv fəaliyyət göstərir. Yoxlamalar zamanı bu obyektlərdən yalnız 27-sinin sanitar-gigiyenik vəziyyəti qənaətbəxş hesab olunub. 47 məntəqədə vəziyyət qismən qənaətbəxş qiymətləndirildiyi halda, 10 məntəqədə ciddi nöqsanlar müəyyən edilərək tam qeyri-qənaətbəxş hesab edilib.

Qaydaları pozan sahibkarlara nöqsanları aradan qaldırmaq üçün icrası məcburi göstərişlər verilib. Agentlik xəbərdarlıq edib ki, verilən vaxt ərzində tələblərə əməl etməyən müəssisələrin fəaliyyəti dayandırılacaq.

Məlumatda həmçinin qeyd olunub ki, ölkənin 33 rayon və şəhərində kəsim məntəqəsi ümumiyyətlə yoxdur və ya fəaliyyət göstərmir. Bu hal qanunsuz kəsim riskini artırdığı üçün həmin ərazilərdə müasir kəsim məntəqələrinin yaradılması vacib hesab edilir.