Astarada yük maşını “Niva” ilə toqquşaraq aşıb: 4 yaralı

Astara rayonunda yaralanma ilə nəticələnən ağır yol-nəqliyyat hadisəsi baş verib.

hadiseler.info xəbər verir ki, hadisə rayonun Təxtənəkəran kəndində qeydə alınıb.

Samid Həmidovun idarə etdiyi “Ford Transit” markalı yük avtomobili ilə Miki kənd sakini, 1957-ci il təvəllüdlü Gülağa Ağahəsən oğlu Əliyevin idarə etdiyi “Niva” markalı minik avtomobili toqquşub. Toqquşmanın ardından “Ford Transit” yoldan çıxaraq aşıb.

Qəza nəticəsində “Niva”nın sürücüsü Gülağa Əliyev və avtomobildə olan üç sərnişin — 1980-ci il təvəllüdlü Rüstəm Gülağa oğlu Əliyev, 2007-ci il təvəllüdlü Elvin Fərhad oğlu Əliyev və 2008-ci il təvəllüdlü Şəhram Rüstəm oğlu Əliyev müxtəlif dərəcəli bədən xəsarətləri alıblar.

Yaralılar Lənkəran Rayon Mərkəzi Xəstəxanasının Təcili Yardım Şöbəsinə çatdırılıblar. Vəziyyəti ağır olan Gülağa Əliyev və Rüstəm Əliyev Reanimasiya şöbəsinə yerləşdiriliblər. Onlara dəqiqləşdirilməmiş kəllədaxili travma diaqnozu qoyulub.

Faktla bağlı müvafiq qurumlar tərəfindən araşdırma aparılır.