Azərbaycan cüdoçuları gənclərin Avropa Kubokunu 7 medalla başa vurdu

Şimali Makedoniyanın paytaxtı Skopyedə gənclər arasında keçirilən cüdo üzrə Avropa Kuboku yarışları yekunlaşıb.

Hadisələr.info bildirir ki, bu barədə Azərbaycan Cüdo Federasiyası məlumat yayıb.

Milli komandamız turnirin sonuncu günündə aktivinə 2 qızıl və 4 bürünc medal yazdırıb. Belə ki, Xədicə Qədəşova (-57 kq) və Davud Namazlı (-100 kq) bütün rəqiblərinə qalib gələrək fəxri kürsünün ən yüksək pilləsinə qalxıblar.

Digər idmançılarımızdan Nərgiz Əhmədova və Gülgəz Musayeva (hər ikisi -48 kq), Aytən Verdiyeva (-57 kq) və Canpolad Əliyev (-100 kq) isə bürünc medala sahib olublar.

Xatırladaq ki, yarışın ilk günündə Nilgün Rzayeva (-63 kq) da bürünc medal qazanmışdı.

Yekun nəticələrə əsasən, Azərbaycan yığması 2 qızıl və 5 bürünc olmaqla ümumilikdə 7 medalla 33 ölkə arasında komanda hesabında 3-cü yeri tutub.