Azərbaycan türkiyəli jurnalisti beynəlxalq axtarışa verdi

Azərbaycanda hakimiyyətin zorla ələ keçirilməsi, konstitusiya quruluşunun zorla dəyişdirilməsi və dini nifrətin salınmasına yönələn çağırışlarla bağlı cinayət işi başlanıb. Türkiyə vətəndaşı olan jurnalist barəsində beynəlxalq axtarış elan olunub.

hadiseler.info xəbər verir ki, bu barədə Baş Prokurorluğun Mətbuat Xidməti rəsmi məlumat yayıb.

Bildirilib ki, sosial şəbəkələrdə müxtəlif şəxslər, o cümlədən Türkiyə vətəndaşı, “Şanlıurfa Olay” qəzetinin köşə yazarı, 1975-ci il təvəllüdlü Celal Çiftçi tərəfindən dövlət əleyhinə materialların paylaşılması ilə bağlı Baş Prokurorluğa daxil olmuş məlumatlar əsasında araşdırma aparılıb.

İstintaq zamanı Nazirlər Kabinetinin 21 sentyabr 2026-cı il tarixli qərarından sonra hakimiyyətin çevriliş yolu ilə ələ keçirilməsinə, konstitusiya quruluşunun dəyişdirilməsinə və dini nifrətin alovlandırılmasına yönələn dini radikalizm məzmunlu materialların, həmçinin süni intellekt vasitəsilə hazırlanmış məzmunların təkrar yayıldığı müəyyən edilib.

Aşkar olunmuş faktlar üzrə oktyabrın 16-da Azərbaycan Respublikası Cinayət Məcəlləsinin 281.2 (dövlət əleyhinə yönələn açıq çağırışlar), 283.2.1 (milli, irqi, sosyal və ya dini nifrət və düşmənçiliyin salınması) və 167-3.1-ci maddələri ilə cinayət işi başlanıb. İbtidai istintaqın aparılması Baş Prokurorluğun İstintaq idarəsinə tapşırılıb.

Celal Çiftçi cinayət işi üzrə təqsirləndirilən şəxs qismində cəlb olunaraq barəsində beynəlxalq axtarış elan edilib. Onun və digər şəxslərin məsuliyyətə cəlb olunması məqsədilə Türkiyənin səlahiyyətli orqanlarına beynəlxalq hüquqi yardım haqqında sorğular göndərilib.

Baş Prokurorluq bir daha vətəndaşları və sosial şəbəkə istifadəçilərini dini zəmində nifrət və düşmənçiliyi təşviq edən məzmunların yayılmasından çəkinməyə və qanunvericiliyin tələblərinə riayət etməyə çağırıb.