Azərbaycan-ABŞ münasibətləri strateji yaxınlaşmadan davamlı tərəfdaşlığa keçərək yeni mərhələyə qədəm qoyur

Prezident İlham Əliyev ABŞ Prezidenti Donald Trampa məktub ünvanlayıb. Məktubda iki ölkə arasındakı münasibətlərin 34 illik diplomatik tarixin ən yüksək səviyyəsinə çatdığı vurğulanıb.

hadiseler.info xəbər verir ki, Bakı ilə Vaşinqton arasında əlaqələr həm siyasi dialoq, həm də əməkdaşlıq baxımından yeni mərhələyə qədəm qoyub. 2025-ci il 8 avqust Vaşinqton Zirvə Görüşü bu münasibətlərin yenidən formatlaşdırılmasında mühüm dönüş nöqtəsi oldu. ABŞ vitse-prezidenti Cey. Di. Vensin Azərbaycana səfəri zamanı Strateji Tərəfdaşlıq Xartiyası imzalandı. Bu sənəd ticarət, enerji, nəqliyyat, süni intellekt və təhlükəsizlik sahələrində geniş imkanlar açır.

Eyni zamanda, Azərbaycan Şərq-Qərb nəqliyyat sistemində və Orta Dəhlizin inkişafında aparıcı rola sahibdir. TRIPP layihəsi və regional kommunikasiyaların açılması ölkəmizi əsas logistika mərkəzinə çevirir. Vaşinqton üçün bu marşrutlar həm iqtisadi, həm də geosiyasi baxımdan böyük əhəmiyyət kəsb edir.

Münasibətlərin daha da möhkəmlənməsi üçün “Azadlığı Müdafiə Aktı”na 907-ci düzəlişin tamamilə ləğvi vacib addım ola bilər. Paralel olaraq Azərbaycan-Ermənistan sülh prosesi və Azərbaycanın öz ərazisindən Ermənistana yük daşımalarına qoyulan məhdudiyyətləri aradan qaldırması regionda etimadı artırır. Bakı üçün ABŞ ilə tərəfdaşlıq milli maraqlara və çoxvektorlu xarici siyasət prinsipinə dayanır.