AZAL-a ayrılan dotasiya 20%-ə yaxın artırılır

Gələn il Azərbaycanın dövlət büdcəsindən “Azərbaycan Hava Yolları” (AZAL) QSC-yə verilən subsidiyanın həcmində artım nəzərdə tutulur.

hadiseler.info xəbər verir ki, bu, 2027-ci ilin büdcə zərfinin layihəsində öz əksini tapıb. Sənəd Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirə olunur.

Layihəyə əsasən, növbəti ildə AZAL-a bu illə müqayisədə 19,5 % çox – ümumilikdə 7,1 milyon manat subsidiya ayrılması planlaşdırılır.

Qeyd olunub ki, bu dotasiya Naxçıvan Muxtar Respublikasına həyata keçirilən aviareyslərə, həmçinin Böyük Vətən müharibəsi əlillərinin və iştirakçılarının, eləcə də onlara bərabər tutulan şəxslərin Müstəqil Dövlətlər Birliyi (MDB) ölkələri istiqamətində nəqliyyatda gedişlə bağlı tətbiq edilən güzəştlər səbəbindən yaranan zərərin ödənilməsinə sərf ediləcək.