Azərbaycan CNN-i məhkəməyə verdi

Azərbaycan ABŞ-nin federal məhkəməsində dünyaca məşhur CNN telekanalına qarşı iddia qaldırıb.

hadiseler.info “Report”a istinadən xəbər verir ki, iddiaya səbəb CNN-in 2026-cı il iyunun 5-də dərc etdiyi və Azərbaycana qarşı təxribat xarakterli əsassız iddiaların yer aldığı məqaləsidir. Həmin yazıda Azərbaycan ərazisindən guya İsrail tərəfindən İrana qarşı hərbi və kəşfiyyat əməliyyatları üçün istifadə olunduğu iddia edilib.

Material dərc olunmazdan əvvəl Azərbaycan rəsmi cavabında bu iddiaları qətiyyətlə təkzib etsə də, CNN rəsmi mövqeyi adekvat əks etdirməyib və anonim mənbələrə istinad edib. Azərbaycan tərəfinin iyun və iyul aylarında təkzib və düzəlişlə bağlı rəsmi məktublarına baxmayaraq, media qurumu heç bir əməli tədbir görməyib.

Nəticədə, Azərbaycan 17 avqust 2026-cı il tarixində CNN-in qeydiyyatda olduğu ABŞ-nin Delaver ştatı üzrə federal məhkəməsində rəsmi iddia qaldırıb. Qeyd edək ki, məqalə müəlliflərindən biri olan Tim Lister bundan əvvəl 2020 və 2023-cü illər hadisələrində də Azərbaycana qarşı qərəzli mövqeyi ilə seçilib.