Azərbaycan–Özbəkistan iqtisadi tərəfdaşlığı: Ticarət dövriyyəsi 3 dəfədən çox artıb  

Azərbaycan və Özbəkistan arasında iqtisadiyyat, energetika və nəqliyyat sahələrində əməkdaşlıq dinamik şəkildə genişlənməkdə davam edir.  

hadiseler.info xəbər verir ki, iki ölkə arasındakı ticarət dövriyyəsi 2025-ci ildə əvvəlki illə müqayisədə 3 dəfədən çox artaraq 795 milyon dollara çatıb. 2026-cı ilin ilk 5 ayında isə bu göstərici 33 faiz artımla 144 milyon dollar təşkil edib. Hazırda Azərbaycanda 130-dan çox Özbəkistan şirkəti fəaliyyət göstərir və onlar işğaldan azad edilmiş ərazilərdəki layihələrə də töhfə verirlər.  

Avtomobil sənayesində birgə əməkdaşlıq çərçivəsində 10 mindən çox “Chevrolet” və 300-dən çox “Isuzu” avtomobili istehsal edilib. Nəqliyyat sahəsində tranzit daşımaların həcmi 1,4 milyon tona çatıb, Bakı ilə Daşkənd və Səmərqənd arasında müntəzəm aviareyslər uğurla həyata keçirilir.

Mədəni və aqrar sahədə də mühüm layihələr icra olunur: Bakının Ağ Şəhər ərazisində 5 hektarlıq “Özbəkistan” parkının təməli qoyulub, Füzulidə isə 100 hektar sahədə nar sortlarının yetişdiriləcəyi “Dostluq bağı” salınır.