Bakı metrosunda sərnişinlərin təhlükəsizliyi üçün yenilik

Bakı metrosunda sərnişinlərin təhlükəsizliyini təmin etmək məqsədilə yeni layihənin icrasına başlanılacaq.

hadiseler.info xəbər verir ki, bu barədə “Bakı Metropoliteni” QSC-nin İctimaiyyətlə əlaqələr şöbəsinin müdiri Bəxtiyar Məmmədov bildirib.

O qeyd edib ki, metro stansiyalarının platformalarında mühafizə sədlərinin çəkilməsi nəzərdə tutulur. Bu addım metroda intiharların, sərnişinlərin qatar yoluna yıxılmasının və əşyaların relslərin üzərinə düşməsinin qarşısını almaq məqsədi daşıyır.

B.Məmmədovun sözlərinə görə, mühafizə sədlərinin quraşdırılması hərəkət sistemlərinin tam yenilənməsindən sonra mümkün olacaq. Hazırda xətlərdə həm yeni, həm də köhnə tipli qatarlar istismar olunur və onların qapı ölçüləri eyni olmadığı üçün sədlərin tətbiqi hələlik imkansızdır.

2030-cu ilə qədər 9 yeni stansiyanın istifadəyə verilməsi, 300 yeni vaqonun alınması və qatar parkı ilə yanaşı müasir sistemlərin tam yenilənməsi planlaşdırılır. Yeni sistemlərin quraşdırılması başa çatdıqdan sonra platformalarda mühafizə sədlərinin çəkilməsi prosesinə start veriləcək.