Baş nazir yeni dövlət proqramı ilə bağlı qurumlara tapşırıq verdi

Azərbaycan Respublikasının Baş naziri Əli Əsədov “Azərbaycan Respublikasında turizmin inkişafına dair 2026-2030-cu illər üçün Dövlət Proqramı”nın icrasının təmin edilməsi barədə sərəncam imzalayıb.

hadiseler.info xəbər verir ki, sərəncama əsasən aidiyyəti dövlət qurumlarına müvafiq tapşırıqlar verilib:

 Dövlət Turizm Agentliyinə: “Turizm haqqında” Qanunun təkmilləşdirilməsi, turizm layihələrinə investisiya təşviqi sənədinin verilməsi mexanizminin yaxşılaşdırılması və çevik təşviq çərçivəsinin yaradılması üzrə təklifləri 2026-cı ilin oktyabr və dekabr aylarında Nazirlər Kabinetinə təqdim etmək tapşırılıb.

 İqtisadiyyat Nazirliyinə: Turizm və rekreasiya zonalarında mehmanxanalar, sanatoriyalar, qış idman obyektləri və konqreslərin təşkili üçün manatla alınan kreditlərə faiz subsidiyalarının verilməsinə dair təklifləri 2026-cı il oktyabrın 20-dək hazırlamaq həvalə olunub.

 Rəqəmsal İnkişaf və Nəqliyyat Nazirliyinə: Hava nəqliyyatının turizmin inkişafındakı rolunun artırılmasına dair təklifləri oktyabrın 20-dək təqdim etmək tapşırılıb.

 İqtisadi İslahatların Təhlili və Kommunikasiya Mərkəzinə: “e-monitorinq” portalında xüsusi Modulun yaradılması və 2027-ci ildən başlayaraq Proqramın icrasının monitorinqi və qiymətləndirilməsini həyata keçirmək tapşırığı verilib.

Sərəncam imzalandığı gündən qüvvəyə minib və icrasına nəzarət Nazirlər Kabineti Aparatının Humanitar məsələlər şöbəsinə həvalə edilib.