Böyük Britaniyanın bir miqrantın deportasiyasına xərclədiyi vəsait məlum olub

Böyük Britaniyada qeyri-qanuni miqrantların ölkədən çıxarılması hökumətə baha başa gəlir.

hadiseler.info xəbər verir ki, “The Telegraph” qəzeti Böyük Britaniya Daxili İşlər Nazirliyinə istinadən məlumat yayıb. Bildirilib ki, bir qeyri-qanuni miqrantın deportasiyası dövlət büdcəsinə təxminən 5 000 funt-sterlinqə (yaxud 6 760 dollar) başa gəlir.

Məlumata əsasən, 2025-ci il fevralın 1-dən 2026-cı il yanvarın 31-dək 74 çarter reysi vasitəsilə 2 835 miqrant ölkədən çıxarılıb. Hər uçuşun orta qiyməti 186 000 funt-sterlinq təşkil edib və hava nəqliyyatı ilə deportasiyaya ümumilikdə 13.8 milyon funt-sterlinq xərclənib. Bəzi xüsusi hallarda, məsələn, yanvarın 7-də səhhətində problem olan bir miqrantın Fransaya aparılması üçün ayrıca təyyarə icarəyə götürülüb. Kölgə kabinetinin daxili işlər naziri Kris Filp bu xərcləri sistemin səmərəsizliyi kimi qiymətləndirərək miqrantların müntəzəm reyslərlə göndərilməsini təklif edib. Ölkədən ən çox deportasiya edilənlər Albaniya (1 810 nəfər), Rumıniya (329 nəfər) və Fransa (282 nəfər) vətəndaşları olub.