Bu dondurmanın satışı qadağan edilib-FOTOLAR

Azərbaycan Respublikasının Qida Təhlükəsizliyi Agentliyi (AQTA) dondurma məhsullarının təhlükəsizlik və keyfiyyət göstəricilərinin qiymətləndirilməsi məqsədilə növbəti monitorinq keçirib.

hadiseler.info xəbər verir ki, monitorinq çərçivəsində 13 istehsalçıya məxsus 27 dondurma nümunəsi laborator müayinələrə cəlb edilib.

Aparılan sınaqlar nəticəsində fiziki şəxs Qasımov Tahir Adil oğluna məxsus emal müəssisəsində istehsal olunan “Fantaziya” əmtəə nişanlı “Matroskin” südlü dondurmasında ciddi uyğunsuzluqlar aşkarlanıb. Məhsul nümunələrində E.Coli və Enterobacteriaceae mikrobioloji göstəriciləri üzrə norma pozuntusu müəyyən edilib. Həmçinin etiketdə kərə yağından istifadə olunduğu qeyd edilsə də, tərkibində bitki sterini olduğu təsdiqlənib.

Aşkar olunmuş nöqsanlarla bağlı müəssisədə dondurma istehsalı dayandırılıb, həmin məhsul partiyasının satışı qadağan edilərək dövriyyədən çıxarılması qərara alınıb. Qərarın icrası nəticəsində ticarət şəbəkələrindən yığılan 38,4 kq və anbardakı 120 kq olmaqla, ümumilikdə 158,4 kq təhlükəli dondurma məhsulu AQTA əməkdaşlarının iştirakı ilə məhv edilib.