Bu gün Azərbaycanda Dövlət Bayrağı Günüdür

hadiseler.info xəbər verir ki, bu gün Azərbaycanda Dövlət Bayrağı Günü qeyd olunur. Azərbaycanın üçrəngli bayrağı dövlət rəmzi olaraq Azərbaycan Xalq Cümhuriyyəti (AXC) Hökumətinin 1918-ci il 9 noyabr tarixli iclasında qəbul olunub.

1920-ci il aprelin 27-də bolşevik işğalından sonra AXC-nin bayrağı Azərbaycan SSR-in qırmızı rəngli oraq-çəkicli bayrağı ilə əvəzlənib. 1990-cı il noyabrın 17-də Naxçıvan MR Ali Məclisinin qərarı ilə bərpa olunaraq Muxtar Respublikanın dövlət bayrağı kimi qəbul olunan bayraq, 1991-ci il fevralın 5-də Azərbaycan Ali Sovetinin qərarı ilə müstəqil respublikanın dövlət bayrağı elan edilib.

Azərbaycan Prezidenti İlham Əliyevin 2009-cu il noyabrın 18-də imzaladığı sərəncamla 9 noyabr tarixi Dövlət Bayrağı Günü kimi təsis edilib. Parlamentin dəyişikliyinə əsasən, bu əlamətdar gün qeyri-iş günü hesab olunur. Həmçinin 2010-cu il sentyabrın 1-də Bakıda Dövlət Bayrağı Meydanının təntənəli açılışı olub və burada Dövlət Bayrağı Muzeyi yaradılıb.

Qeyd edək ki, üçrəngli bayrağımızdakı “Türkçülük, islamçılıq və müasirlik” formulunun müəllifi görkəmli mütəfəkkir Əli bəy Hüseynzadədir.