Bu gün Azərbaycan sərhədçilərinin peşə bayramı günüdür

Avqustun 18-də Azərbaycan Respublikası Dövlət Sərhəd Mühafizəsinin yaradılmasının 107-ci ildönümü və sərhədçilərin peşə bayramı qeyd olunur.

hadiseler.info xəbər verir ki, milli sərhəd mühafizəsinin bünövrəsi 1919-cu il avqustun 18-də Azərbaycan Xalq Cümhuriyyəti Parlamentinin “Sərhədlərin mühafizəsi haqqında” Qanunu ilə qoyulub. Ümummilli Lider Heydər Əliyevin 2000-ci il sərəncamı ilə bu tarix rəsmi peşə bayramı kimi təsbit edilib. 2002-ci ildə Dövlət Sərhəd Xidmətinin (DSX) yaradılması ilə sərhədlərin etibarlı qorunması strategiyası yeni mərhələyə qədəm qoyub.

Prezident, Müzəffər Ali Baş Komandan İlham Əliyevin rəhbərliyi ilə DSX-nin hərbi-texniki potensialı kəskin gücləndirilib, DSX Akademiyası təsis edilib, dəniz və hava sərhədlərinin mühafizə sistemi beynəlxalq standartlara uyğunlaşdırılıb. Sərhədçilərimiz 44 günlük Vətən müharibəsində də böyük fədakarlıq göstərərək 132 kilometrlik Azərbaycan-İran sərhədinin, Füzuli, Cəbrayıl, Zəngilan, Qubadlı, Hadrut və Şuşanın azad olunmasında yaxından iştirak ediblər. Əməliyyatlar zamanı DSX-nin modern PUA-ları tərəfindən düşmənin 290 strateji hədəfi imha edilib.

Bayram ərəfəsində Prezident İlham Əliyevin imzaladığı sərəncamlarla DSX-nin bir sıra hərbi qulluqçularına ali hərbi rütbələr verilib, xidməti vəzifələrini layiqincə yerinə yetirən və şəhid olan əməkdaşlar müxtəlif orden və medallarla təltif olunublar.